كنت باحلم
تحضنيني فـ يوم زفافي
أيوه يامَّه كنت باحلم
ياللي دايماً ساكنه فيَّه
ومضة الضيّ فـ عنيَّه
فاكره يامَّه
لمَّا كنتي بتحضنيني
وتمسحي بإيدك جبيني
وتسأليني
هوَّ انا هاحضر زفافك
ولَّا هتسافر سنيني ..!
مِن حنيني لحلم أمِّي
كان زفافي فـ عيني منظر
كنت باحلم إني دايماً
هاسبق الأيام وأكبر
لمَّا لحظة شوفت أمِّي
ساكته خالص
رُحت اهزّ إيديها وقعت
من إيديه
وفـ عينيها ألف معنى
للوداع .. مش حلو خالص
والنهارده خلاص كبرت
بس إحساسي
بنفسي ماعدش زي زمان
زهقت..!
وايه يكون طعم الحياه
لو مافيها نور عينيها
وفرحتي ما بين إيديها
كل ما اتألم باكلِّم
نفسي فـ مرايتي وابلِّم
كيف هادوق الفرحة يامَّه
وانتي سايباني لوحدي..؟
كيف هاعيش الحلم وامتى
لو مكانك فاضي عندي..؟!
#عن_امي
#دعاء_جمال
